چانگ، ساجن: مشهور سگهڙ ۽ نڙائي ساجن ولد محمد ابراهيم چانگ، 1947ع ڌاري ڳوٺ مٺي خان چانگ، تعلقي ٽنڊي غلام حيدر، ضلعي حيدرآباد ۾ جنم ورتو. ساجن چانگ نڙ وڄائڻ جو ماهر فنڪار آهي. سانجن چانگ، نڙ جا بيت ڪهڙي به داستان جا هجن، گهڻوڪري لوڙائو راڳڻيءَ ۾ ڏيندو آهي. هن جو سؤٽ عيدن خان پنهنجي وقت جو وڏو سگهڙ ٿي گذريو آهي ۽ اهو به نڙ تي بيت ڏيندو هو، سندس پهريون استاد به اهو ئي هو، ان کان پوءِ ڪجهه وقت اسحاق فقير جي شاگرديءَ ۾ رهيو. کيس ريڊيو پاڪستان حيدرآباد تي 1970ع ۾ پهريون ڀيرو امداد خواجه، منظور نقوي ۽ غلام حسين شيخ رڪارڊ ڪيو. مشهور ٽي. وي براڊڪاسٽر عبدالڪريم بلوچ 1972ع ڌاري کيس پي. ٽي. ويءَ تي آندو ۽ هن نڙ بيت پيش ڪيا. سنڌ ٽي. وي، ڪي. ٽي. اين ۽ ٻين چئنلن تي ڪيترا پروگرام ڪري چڪو آهي. ساجن چانگ، ڊاڪٽر نبي بخش خان بلوچ کي نڙ بيتن گڏ ڪرڻ ۾ ڪافي معاونت ڪئي. کيس ڪيترا اوارڊ مليا آهن، جن ۾: جلال کٽي اوارڊ، سانوڻ فقير لاڙ اوارڊ، سنڌ اوارڊ، لعل شهباز اوارڊ ۽ ’سنڌ صدين کان اوارڊ‘. ساجن چانگ جي شاگردن جو حلقو ڪافي وسيع آهي. گهنور ڪالرو، بنگل چوهاڻ، فضل دائيداڻو، عظمت لاشاري سندس قابل ذڪر شاگرد آهن.